martes, 8 de mayo de 2018

ine, Viño, Cultura. Julio Camba. Ateneo. CGAC. Son de Arrieiro

      

XORNADAS DE CINEMA, VIÑO E CULTURA   GALEGA. 3ª SESIÓN
JULIO CAMBA. TALENTO, HUMOR E GASTRONOMÍA.  DOCUMENTAIS:
BARCELONA 1900. MADRID 1910

Colabora: Ateneo de Santiago
Condutor da Sesión: Xavier Castro
LugarCafetería do CGAC. Rúa Valle-Inclán, 2. Santiago de Compostela.
Data: Mércores, 9 de Maio, de 20 a 22 horas.
ADEGASon de Arrieiro (Leiro. D.O. Ribeiro)
Intervirá a adegueira Xulia Mar Bande.

PRESENTACIÓN

A terceira sesión das Xornadas de Cinema, Viño e Cultura Galega, realizadas en colaboración co Ateneo de Santiago, está dedicada a glosar a traxectoria vital e a obra de Julio Camba, nado nunha terra fértil en creadores, Vilanova de Arousa, cando corría o ano 1882. Desempeñouse como corresponsal de prensa en varias capitais estranxeiras, cultivando con extraordinario talento a crónica e a literatura xornalística. Pergueñou os seus artigos cun inconfundible estilo, xalonado con celebrados rasgos de ironía e humor intelixente, que induciu a Ortega y Gasset –de ordinario pouco propenso a eloxiar os merecementos dos demais intelectuais­-, a consideralo como “la más pura y elegante inteligencia de España”.
Os comentarios do condutor do evento, Xavier Castro, darán conta das características esencias da súa obra literaria, moi vencellada a súa peripecia vital, e aludirán ás referencias que o escritor de Vilanova fai á cultura do viño e a gastronomía, nomeadamente no seu libro La casa de Lúculo. Mais convén tamén mollar a palabra, e deste xeito as glosas e achegas documentais iranse entreverando co goce hedonista dos viños do Ribeiro, e o recitado dunha escolma de textos senlleiros de Camba. Mesturado con isto, exhibiranse documentais e videoclips musicais representativos da época na que desenvolveu a obra este magnífico escritor, primordialmente a propia dos cabarés e cafés cantantes, nos que as cupletistas de moda regocixaban ao público. Este conversador infatigable foi asiduo ás tertulias dos cafés, aos que se desprazaba dende a habitación sinxela do hotel Palace, que ocupaba en graza da amizade, por carecer de domicilio propio. De feito, rexeitou a proposta de incorporación á Real Academia Española, aducindo, con retranqueira modestia, que aquelo non podía ser posto que o que se lle ofrecía era un sillón cando o que el necesitaba era un piso.
          Para mollar cumpridamente a palabra, haberá ocasión de catar os excelentes viños, branco e tinto, elaborados ambos con castes autóctonas, da recoñecida adega de Leiro, Son de Arrieiro, que goberna con acerto unha das mulleres que están a romper a pana no mundo da viticultura, considerado tradicionalmente como un reducto masculino, Xulia Mar Bande.
Agora ben, como sinalaba Otero Pedrayo, non é posible entender a Galicia do viño sen a Galicia do pan. Consecuentemente, serviranse petiscos de pans de calidade, friames, queixo galego e un gastropetisco inspirado en Julio Camba, que a todo isto da dereito a inscrición que se efectuará con antelación na cafetería do CGAC ou ben por mediación do Ateneo, opción reservada para os seus socios.

LUGAR DE REALIZACIÓN
Cafetería do Centro Galego de Arte Contemporáneo (CGAC). Rúa Valle-Inclán, 2. Santiago de Compostela.

DATA
Mércores, 9 de Maio.

HORARIO
De 20 a 22 horas.

PREZO
-12 euros (con dereito a varios viños e petiscos).
-Aforo limitado polo que é imprescindible reservar. Venda de entradas en Cafetería do CGAC (Luns pechada): cafeteriacgac@gmail.com / Teléfono: 981 546 624.

martes, 1 de mayo de 2018

    

Xornadas de Cinema, Viño e Cultura          Galega. 2ª Sesión: ROSALÍA DE CASTRO TRIBULACIÓNS DUNHA LITERATA.  FILME: historia de ser muller


Colabora: Ateneo de Santiago
Condutor da Sesión: Xavier Castro
Lugar: Cafetería do CGAC. Rúa Valle-Inclán, 2. Santiago de Compostela.
Data: Mércores, 2 de Maio, de 20 a 22 horas.
ADEGA: PACO & LOLA (D.O. Rías Baixas)

PRESENTACIÓN

     A segunda sesión das Xornadas de Cinema, Viño e Cultura Galega, realizadas en colaboración co Ateneo de Santiago, está dedicada a glosar a traxectoria vital e a obra de Rosalía de Castro, unha das grandes creadoras da cultura europea oitocentista. Como é ben patente, aínda gozan os seus versos de louzanía e resultan vibrantes e emotivos para os lectores do noso tempo. A súa obra ten ademais un grande interese etnolóxico e contén unha fecunda canteira de referencias aos viños e xantares de nós, que haberá que salientar. Deste xeito, os comentarios do condutor deste evento, Xavier Castro, darán conta das características esencias da súa obra literaria, moi vencellada a súa peripecia vital, e dos atrancos e discriminacións que afectaban de xeito indefectible ás mulleres escritoras para ver recoñecido o seu talento.
     As glosas e achegas documentais iranse entreverando co goce de excelentes viños e a recitación de textos senlleiros de Rosalía, intercalados con cantigas populares, poemas musicados e cancións en videoclips, nomeadamente de Amancio Prada, Luís Emilio Batallan e Luz Casal.
     Para mollar cumpridamente a palabra, haberá ocasión de catar os excelentes viños da adega Paco & Lola, unha das máis prestixiosas de Galicia (Denominación de Orixe Rías Baixas) que presentará as súas recoñecidas referencias, unha das cales denominada Follas Novas, en homaxe á poetisa galega. Agora ben, como sinalaba Otero Pedrayo, non é posible entender a Galicia do viño sen a Galicia do pan. Consecuentemente, serviranse petiscos de pans de calidade, friames, queixo galego e un gastropetisco rosaliano (creación do chef Diego Marzoa), que a todo isto da dereito a inscrición que se efectuará con antelación na cafetería do CGAC ou ben por mediación do Ateneo, opción reservada para os seus socios.

LUGAR DE REALIZACIÓN
Cafetería do CGAC. Rúa Valle-Inclán, 2. Santiago de Compostela.

DATA
Mércores, 2 de Maio.

HORARIO
De 20 a 22 horas.

PREZO
-12 euros (con dereito a varios viños e petiscos).
-Aforo limitado polo que é imprescindible reservar. Venda de entradas en
Cafetería do CGAC (Luns pechada): cafeteriacgac@gmail.com / Teléfono: 981 546 624.



Xavier Castro: Especialista na historia da cultura do viño e a alimentación, director de varios proxectos de investigación e Premio Picadillo do Fórum Gastronómico 2015. Libros do autor: A rosa do viño (Galaxia), A lume manso (Galaxia), A la sombra ejemplar de los parrales (Trea) e A mesa e manteis (Biblos) / E-mail: f.x.cp@hotmail.com / Móbil: 609 653 228