XORNADAS DE CINEMA, VIÑO E CULTURA (VIGO)
2ª SESIÓN: LISBOA, A VILLE
BLANCHE. FERNANDO PESSOA. FILME: SOSTIENE PEREIRA
VIÑOTECA
AVELEIRA
UN ÁMBITO PARA A
CULTURA E O GOCE DO VIÑO
Condutor da Sesión: Xavier Castro
Lugar: VIÑOTECA AVELEIRA (Rúa Abeleira Menéndez, 28, Baixo. 36202 Vigo. (Casco Vello de arriba).
Data: Mércores, 27 de Setembro,
ás 20’30 horas.
Adega: ARCO DA VELLA (Beade. D.O. Ribeiro)
(Intervirá o adegueiro: Eladio Rodríguez)
PRESENTACIÓN
Poñerase
de manifesto neste evento o elevado poder de evocación que ten un bo viño,
posto que como apuntaba certeiramente Álvaro
Cunqueiro, non se bebe para olvidar -como adoita rezar o tópico da
desventura- senón para recordar. E haberá que lembrar a
invocación de Borges expresada nun soneto consagrado ao viño: “Vino, enséñame el arte de ver mi propia
historia / como si ésta ya fuera
ceniza en la memoria”.
Deste
xeito, na 2ª sesión das Xornadas de
Cinema, Viño e Cultura, adentrarémonos no ambiente cultural da cidade de Lisboa, por cuxas rúas
deambulaba Fernando
Pessoa, como un dandi con aires de flâner baudelairiano recalando nos cafés
da Baixa e o Chiado (en cuxos locais estivo tan presente a emigración galega), como A Brazileira, nunha época de desasosego como foi a primeira metade
do século XX. Sentirémonos, sen dúbida, animados pola cálida compaña de
Marcello Mastroianni no filme Sostiene
Pereira (dirixida por Roberto Faenza, no ano 1996), cun guión baseado na
novela dun grande amador de Lisboa: Antonio Tabucci. Seguiremos, así, o itinerario lisboeta marcado por
Alain Tanner no filme Dans la Ville
Blanche (1983) e non sería de estrañar que bateramos con algún dos
heterónimos pessoanos convertido en personaxe, como lle aconteceu a Saramago
con Ricardo Reis.
O fado de Amália Rodrigues e senlleiras cancións
portuguesas, como a que marcou a revolución dos cravos, Grândola, Vila Morena,
de José (Zeca) Afonso, proporcionarannos a atmosfera emotiva na que rebuliron
nos anos trinta, o galeguista Ramón
Martínez López, o polígrafo Gómez de la Serna, o xornalista Julio Camba e, tras
do estalido da guerra civil, o filósofo José Ortega y Gasset.
Evocaremos
as tabernas emprazadas nos cais da
desembocadura do Tejo, onde se falou
nun tempo de Teixeira de Pascoaes e a filosofía do saudosismo portugués, divulgada polo grupo
Renascença na publicación bimensual A Águia, que Vicente Risco tivo por irmá da revista Nós.
Os ecos desta teoría suscitaron o interese dun sector da intelectualidade
galega, no que velaban armas Celestino Fernández de la Vega e Ramón Piñeiro,
resoltos a indagar na esencia da identidade galega, expresada quer nun humor
peculiar, ou quer nunha saudade característica, consideradas ámbalas dúas
temáticas dende un prisma heideggeriano.
Deste
xeito, os comentarios do condutor da sesión, Xavier Castro, darán conta dos gustos predominantes en materia de
viños e outras bebidas e das claves esenciais do devandito poeta. Como
contrapunto, escoitaranse en boa hora as achegas do adegueiro ao fronte da Adega Arco da Vella, que elabora uns viños artesáns
de salientable calidade con uvas procedentes das propias cepas centenarias,
situadas en Beade – Ribadavia (na Denominación de Orixe Ribeiro). Deste xeito,
a familia de adegueiros que puxo en pé Arco da Vella ven practicando o amor
polos viñedos dende hai varias xeracións, desterrando da súa práctica vitícola
o emprego de productos herbicidas e pesticidas. Súmase a isto a concienzuda
aplicación na elaboración dos seus viños, e así é como consegue obter uns
productos naturais de singulares características organolécticas que polo
recendo, cor e padal fan que, con todo merecemento, os podamos inxerir na
mellor xinea dos grandes ribeiros tradicionais, que estes adegueiros foron quen
de preservar tan cumpridamente. Presentará esta adega o tinto Tarabelo,
de cor bermella de cereixa, redondo, largacío e de gorentoso recendo, e non
faltará tampouco un branco de resonancias célticas, Torque do Castro, de cabal intensidade, pleno e de prolongado
post gusto.
Agora
ben, como sinalaba Otero Pedrayo, non é posible
entender a Galicia do viño sen a Galicia do pan. Consecuentemente, serviranse
petiscos de pan artesán con friames e
queixo galego de calidade, que a todo isto da dereito a inscrición que se
efectuará na Viñoteca Aveleira.
(Prezo: 13 euros)
LUGAR DE REALIZACIÓN
Viñoteca Aveleira (Rúa Abeleira Menéndez, 28, Baixo. 36202 Vigo. (Casco Vello de arriba).
DATA
Mércores, 27 de Setembro.
HORARIO
De 20’30 a 22’15 horas.
PREZO:
13 euros, con dereito a varios viños e petiscos de pans artesáns con friames e queixo galego
de calidade.
-Aforo
limitado. Imprescindible reservar: jcoow64@gmail.com / 601 08 01 21
Xavier Castro: Especialista na historia do viño e Premio
Picadillo do Fórum Gastronómico 2015. Libros do autor: A rosa do viño (Galaxia),
A lume manso (Galaxia), A la sombra ejemplar de los parrales
(Trea) e A mesa e manteis (USC)
Condutor da Sesión: Xavier Castro